सोलापूर : विविध स्पर्धा परीक्षांची तयारी कशी करावी याबाबत ‘ड्रीम फाउंडेशन’तर्फे आयोजित कार्यक्रमात लोकसेवा आयोगाची परीक्षा उत्तीर्ण झालेले रविराज कलशेट्टी यांनी मार्गदर्शन केले. ‘ड्रीम आयएएस सेंटर’ येथे दोन जुलै रोजी झालेल्या कार्यक्रमाला विद्यार्थी आणि पालक मोठ्या संख्येने उपस्थित होते. स्पर्धा परीक्षेतील यशाचा कानमंत्र रविराज यांनी दिला. ‘आपण कोणती परीक्षा देणार त्या परीक्षेची माहिती करून घ्या, रोज नियोजनपूर्ण अभ्यास करा, एक क्षणही वाया घालवू नका,’ असा सल्ला त्यांनी दिला.
या वेळी संयोजक काशिनाथ भतगुणकी यांनी अभ्यासाचे नियोजन यावर चर्चा केली. विद्यार्थी अपयशी का होतात हे मार्मिक पद्धतीने त्यांनी समजावले. पूर्व, मुख्य परीक्षा व मुलाखत तयारी यासह निबंधलेखन कसे करावे, हेही त्यांनी सांगितले. ‘रोज किमान १० तास अभ्यास करा, नियोजन खूप महत्त्वाचे आहे, पुस्तकांचा संग्रह करा, रोज चर्चा करा,’ असे उपयुक्त मुद्देही त्यांनी सांगितले.
